22 octubre 2008

Freemos o cambio climático


A ANPA Caramecheiro do IES número 1 de Ribeira, xunto co Departamento de Ciencias dese Instituto, acaba de presentar a exposición “Freemos o cambio climático”. Esta exposición, promovida polo colectivo ecoloxista Verdegaia, consta de 14 paneis, que se poden ver na biblioteca do Instituto dende hoxe ata o vindeiro día 7 de Novembro.

A exposición, que é unha adaptación a Galicia da concibida a nivel estatal por “Ecologistas en Acción”, explica que é o cambio climático, cales son os seus efectos a nivel mundial e na Península Ibérica, as súas causas, e trata de expoñer as mellores solucións para poñerlle freo.

Os obxectivos da exposición son concienciar ao alumnado sobre a magnitude e a urxencia do problema do cambio climático, e estimular a súa participación na loita contra o maior problema ambiental global.

Preténdese demostrar que o uso que facemos da enerxía na nosa actividade diaria (no transporte, a calefacción, a iluminación, etc.) contribúe ás emisións de CO2, o principal gas de invernadoiro. O alumnado, o profesorado, as familias e a sociedade en xeral, pode ser parte da solución ao cambio climático facendo un uso eficiente da enerxía, elixindo tecnoloxías que aforren e prescindindo de excesos de consumo.

A exposición estará complementada cunha charla de Miguel Pardellas, experto medioambiental da Sociedade Galega de Educación Ambiental, dirixida ao alumnado de Bacharelato da materia de Ciencias para o Mundo Contemporáneo.

28 mayo 2008

MUIÑADA DE AMENDO


Este sábado 31 de maio terá lugar nos muiños de Amedo, no Parque Natural a III muiñada organizada pola asociación Altofalante, coa colaboración da nosa ANPA.

Estades todos convidados a participar.

O programa:

ROMERIA


11:30 Moenda e charla sobre os muiños de Amendo.
12:00 Fornada e degustación de pan de millo elaborado no forno dun dos muiños.
12:30 Repoboación polos rapaces e rapazas,tamén polos maoires, dun espacio
queimado dirixida por Juan Francisco Ramallo, Presidente da Comunidade
de Montes de Carreira. Colocarase unha placa na zona repoboada.
14:00 Xantar, (levarase comida para compartir)
Presentación das "Pandereteiras da Escola de Música Bastantes Llon".
16:00 Maquillaxe de Cara por Roulotte Papillotte.
17:30 Contos no muiño, a cargo da escritora, actriz e contacontos: Paula Carballeira


SERAN



18:30 Actuación do grupo musical: Renato Spencer&café caxaça.
-Troula e merenda.

* Xornada amenizada por gaiteiros.
* Exposición fotografica da Muiñada 2007


É MOI IMPORTANTE A PARTICIPACIÓN DOS MAIORES
COS RAPACES E RAPAZAS PORQUE PRETENDEMOS....

* Fomentar o respecto e a participación responsábel co medio natural.
* Favorecer a sensebilización a respecto das problematicas ambientais.
* Fomentar a lectura e a tradición oral e etnografíca.
* Abrir novos espacios de lecer e convivencia para os nosos fillos.
* Novas formas de relacionarse, divertirse e vivir o ocio, a mocidade e a familia.
* Estableceriase así mesmo a transferencia de experiencias e coñecementos entre as diversas xeracións, alumeando o porvir tecnolóxico actual coa base firme das nosas raices e tradicións...

17 abril 2008

Ribeira contará cunha sección da Escola Oficial de Idiomas o próximo curso

Vemos na Voz de Galicia de hoxe que Ribeira contará cunha sección da Escola Oficial de Idiomas o próximo curso. É unha boa nova. Cando na ANPA soubemos que a Escola Oficial de Idiomas que está a funcionar no noso Instituto ía a desaparecer, estivemos a falar do asunto cos profesores e amosamos o noso apoio para que non desaparecera.

Non parecía viable que os os rapaces tivéranse que trasladar ata Noia para atender as clases.

28 febrero 2008

Responsabilidade, liberdade?



El Adarve é un blog que leo con frecuencia. Vale a pena botar unha ollada de cando en vez. A entrada de hoxe titúlase "Filete de profesor". E nela cuestionase porqué en moitos centros de ensino non hai papel hixiénico nos baños. A resposta a bote pronto pode parecer obvia, mais se profundamos nas implicacións educativas deste costume, quizais non sexa tan obvio. I é que non hai responsabilidade sen libertade.

Botade tamén unha ollada aos comentarios.


Foto de anyjazz65

22 enero 2008

Colabora cos profes, ca ANPA e cos teus fillos e fillas

A ANPA do IES número 1 de Ribeira cree que unha das misións máis importante que ten é a de colaborar na Educación dos nosos fillos e fillas co profesorado. Para iso entre outras cousas, temos que intercambiar ideas e experiencias e buscar xuntos solucións aos problemas que se expoñan, tanto os referentes aos nosos fillos como ao centro en xeral.

E niso estamos, e así témosllo demandado á dirección e ao profesorado do Centro. Eles tamén están moi receptivos cas nosas propostas, e estámonos a reunirnos con eles para concretar a nosa colaboración.

Polo de agora, o equipo de profesores que coordinan a biblioteca e o equipo de normalización lingüística xa ten concretada a nosa participación nun proxecto que están a poñer en marcha.

Trátase dun arquivo de recursos para o profesorado que os familiares esteamos dispostos a ofertar para desenvolver a actividade educativa fora do centro, ou de algún recuso que se poda aportar as actividades no centro.

¿Que é iso que demandan? Pois nada en concreto e moitas cousas xuntas. Como sabedes é conveniente que a practica educativa estea adaptada as circunstancias do entorno. Por iso tal vez ti coñezas a un armador dun barco pesqueiro que poda ser visitado polos rapaces e rapazas; ou saibas dun muíño que poda servir para explicar nunha aula de tecnoloxías como eran estas fai uns anos e ver no sitio como funcionan as súas diferentes partes; ou quizais o avó poda dar unha clase maxistral de música porque é un “virtuoso da gaita”; ou coñezas a un empresario que teña un negocio que pode ser interesante para os rapaces; ou... As propostas son infinitas. Agora só tes ti que transmitírnolas.

O feito que propoñas unha idea, non quere dicir que se vaia a utilizar. Simplemente é un recurso co que poden contar os profesores e profesoras para o ensino.

Por favor, tómate un pequeno esforzo en pensar en eses recursos e poñelos á disposición dos teus fillos e fillas e dos seus compañeiros. Paga a pena.

Só necesitamos. O teu nome e datos de contacto, o recurso proposto cun pequeno comentario das actividades que se podan desenvolver, do que se pode ver alí. O enderezo do recurso. O nome e os datos de contacto da persoa responsable do mesmo. E algunha observación que queiras facer sobre o mesmo. Se tedes unha foto tamén podería ser interesante.

Este é un modelo para que vos poda servir de referencia.

09 enero 2008

Campaña esquí 2008


A Deputación da Coruña está a promover unha campaña de esquí para rapazas e rapaces de entre 10 e 13 anos ambos inclusive en Sierra Nevada.

Se vos interesa, podedes inscribirvos ata o 28 de xaneiro no Concello. A cota de inscrición é de 95 euros, e a quenda para o Concello de Ribeira é do 9 ao 16 de febreiro. Na páxina web de deputación tendes toda a información.

05 diciembre 2007

Suspensos en prevención de incendios


Hoxe o publica La Voz de Galcia (a foto tamén é de eles) Frustrado simulacro de incendio no Instituto Número Un. Non pasa nada se os erros sérvennos para aparender.

Para iso son as avaliacións. Nós os familiares temos que poñer en valor estas actividades para que os rapaces tomen en serio estes adestramentos para emerxencias.

04 diciembre 2007

Comentando PISA

Interesante artigo de El País sobre as valoracións que se fan ao informe PISA sobre calidade do ensino Avisos para no quedar en evidencia comentando PISA.

As receitas que propón o autor:
  • ver menos televisión,
  • pasar máis tempo cas nais e pais,
  • dar máis prestixio aos profesores,
  • aumentar a popularidade dos empollones
  • instruír deleitando.

28 noviembre 2007

Invitación ao teatro

Mañá, xoves 29 de novembro ás 20:30 o Grupo de teatro do IES nº 1 de Ribeira “Jakunamatata” fará unha representación co motivo da conmemoración do 25 de novembro “Día Internacional contra a violencia ás mulleres”.

Esta representación está especialmente dirixida os pais/nais do alumnado do Centro e estaría ben que acudísedes.

21 noviembre 2007

Novas educativas na prensa local

Hoxe, a edición comarcal da Voz de Galicia ven cargada de novas educativas.

O Instituto Número Un fará un acto en recordo de todas as vítimas de maltrato este ano. Van conmemorar, con diversas actividades dende hoxe ata o venres, o día contra a violencia contra as mulleres que terá lugar o día 25. Participará o grupo de teatro do instituto Jakunamatata dirixido polos profesores Purecha Rodríguez, Carlos Pereira e Carmen Segade.

Onte celebrouse o Día Universal dos Dereitos dos nenos, e con ese motivo xuntáronse no Concello varios centenares de alumnos de ESO.

Parece que tamén as Autoridades do Concello están a poñerse en contacto cas Autoridades Educativas para arranxar algúns problemas no transporte escolar de estudantes de ESO. Os pais ben sabemos dos problemas dos transportes (especialmente naqueles lugares afastados do centro), mais non é admisible que os rapaces teñan que camiñar un quilometro para achegarse á parada do autobús.


15 noviembre 2007

Escola de Pais de Renacer


Temos recibido na asociación unha invitación da Asociación Antidroga Renacer para a creación ou participación nunha escola de pais con os nosos asociados.

Renacer é ben coñecida por todas as xentes de Ribeira. Leva moitos anos loitando cotra a droga. Mais tamén leva xa moitos anos facendo a súa Escola de Pais (esta é xa a súa XV edición) que ten un grande recoñecemento entre os educadores non só de Barbanza senón de toda Galicia.

Eles dannos a oportunidade de organizala no xeito que nós queiramos. Podemos facela de forma continuada ao longo de varios meses, ou ben organizando obradoiros de contidos específicos.

Sería unha magoa que deixásemos perder esta gran oportunidade que están a brindarnos. As nais e os pais somos os principais responsables da educación dos fillos, e estes non ven con un manual de instrucións. Porén estas Escolas de Pais poden ser unha inmellorable oportunidade para formar nos.

02 noviembre 2007

Inmigración Hoxe - Curso semipresencial

No Centro ECCA de A Coruña levaraise a cabo os próximos días 5, 12, 19 e 26 de novembro en horario de 18:30 a 21:00 h un curso semipresencial sobre Inmigración Hoxe que se combinará o traballo na casa (fichas para completar con clases gravadas en audio).

Entre outros esta dirixido ás nais e aos pais das ANPAS.

Obxectivos do curso son:

  • Sensibilizar á poboación sobre o fenómeno migratorio.
  • Delimitar o concepto de inmigración.
  • Analizar as causas e consecuencias do fenómeno migratorio.
  • Tomar conciencia, recoñecer e cambiar algunhas ideas erroneas acerca da poboación inmigrante.
  • Analizar os movimentos migratorios dende un punto de vista histórico.
  • Describir o marco legal
  • Analizar as consecuencias que xenera nos/as inmigrantes o abandono do seu país de orixe: os duelos
Se te interesa ir podes obter máis información en:

Radio ECCA Fundación
R/ Bugallal Marchesi, 9, baixo A
15008. A Coruña
Tfno: 981 293 658.
acoruna[arroba]radioecca.org